Rev 1 | MED | STEP | Ya buk kᵾⱡ ila, Got ndi, uⱡ wote pemba mbᵾ, Jisas Kraist kᵾn tᵾpa ora ndurum. Ei elim nga kongun wamp mbᵾ, kondpa nangga, nimba itim. Wote Jisas ndi, elim nga anggelo ei, tᵾpa munduⱡnga, omba uⱡ nondpa pemba mbᵾ, kongun wu Jon kundpa nitim.

Revelation of John 1

Kraist Ndi, Jon Kᵾn Uⱡ Mo Ropa Mbᵾ, Tᵾpa Ora Ndurum

1 Ya buk kᵾⱡ ila, Got ndi, uⱡ wote pemba mbᵾ, Jisas Kraist kᵾn tᵾpa ora ndurum. Ei elim nga kongun wamp mbᵾ, kondpa nangga, nimba itim. Wote Jisas ndi, elim nga anggelo ei, tᵾpa munduⱡnga, omba uⱡ nondpa pemba mbᵾ, kongun wu Jon kundpa nitim. 2 Wote, Jon ndi, uⱡ kandpa pitim mbᵾ mel pora, mbi ropa mana ndurum. Wote ronduⱡ mundpa, nimba mel, Got nga ik ei kupa mint petᵾm ei, Jisas Kraist ndi, etpa mot ndurum. 3 Ei kᵾn, pai nomba nitim ik mong kᵾⱡ, kᵾmp rom wamp ti ndi, numan kai pilangga! Wote ik kᵾⱡ, kum tepa pilpa pep rom wamp ei, numan kai pilangga! Ei nambuⱡ emel, uⱡ kᵾⱡ ui nondpa tila, omba pemba.

Jon Ndi, Got Nga Rapa Tenda Wamp 7 Kᵾⱡ Kᵾn, Rawe Ik Nimba Mundrum

4 Na Jon ndi, enim Got nga rapa tenda wamp ei nga kona 7 wᵾl Eisiya kona ou ila mormin kᵾⱡ kᵾn, rawe ik mbᵾ nᵾmp, mon rop ngunt. Got ei, unt murum, akup morum, wote yant omba ei kᵾn, wote Muⱡnga 7 kat, elim nga rᵾpᵾndi pol ila mormin kᵾⱡ nga, wamp poⱡ ti uⱡ wamp moⱡpa kundi uⱡ tetmin kᵾⱡ, enim kᵾn omba piyangga! Wote, Got kangᵾm wu kumina, elim kuimp tepa, wamp kui kona ila ⱡoporpa kont murum, rᵾk rᵾk ik kupa nimba, wote mᵾi kona nuim mumuk mbᵾ nga rᵾp wu moⱡpa etᵾm wu Jisas Kraist nga wamp poⱡ ti uⱡ, moⱡpa kundi uⱡ tetᵾm mbᵾ, enim kᵾn kan piyangga ku! Jisas Kraist ndi, tᵾn numan ngumba, elim kaⱡpa mema oi ndurum ei ndi, tᵾn uⱡ kit ila tinga ndupa titim. Wote, tᵾn elim nga tᵾpa mumuk rurum wamp kᵾⱡ tᵾpa, elim nga Tipam Got nga pris kᵾⱡ moⱡpᵾn, elim nga kongun wamp muⱡᵾmin nimba itim. Uⱡ rᵾpᵾndi eng nui mbᵾ kᵾn, uⱡ ronduⱡ pi mbᵾ pora, Nuim Jisas Kraist elim kᵾn, uⱡ nga kᵾnt nga pepa mint pangga! Ei kupa! 7 Wu ei, kopa pol ila onum ei, kanmin muna mon? Elim kupanda ei ndi, porung wamp mbᵾ ndi kep, wamp elpa elpa mbᵾ ndi pikᵾ kᵾning. Ya mᵾi kona wamp mbᵾ ndi pora, wu ei om kᵾn, ka mam ti iting. Ei kapⱡa piyangga mint, ei kupa. 8 Ronduⱡ pi Wu Nuim Got unt murum, wote akup morum, wote omba wu ei ndi, nimba mel, “Kokila puⱡ mundi uⱡ mbᵾ kep, wote etpa pora ndui uⱡ mbᵾ kep, na mint mor,” nᵾtᵾm.

Ⱡoporpa Omba Purum Wu Kraist Ni, Jon Kᵾndrᵾm

9 Na Jon ei, enim nga ᵾngᵾn ei, wote Jisas pep ror uⱡ ei ndi, enim kᵾn na kᵾn, rᵾmp nilinga mormin. Ei kᵾn, elim nga tᵾpa mumuk rorum wamp mbᵾ kᵾn, uⱡ mindil nui mbᵾ, kapⱡa etpᵾn ronduⱡ mbun tᵾtmᵾn. Na nu muⱡ kuimp mᵾi Patmos ila mek puk mondrung. Ei nambuⱡ emel, na Got nga ik mong kᵾⱡ para ndup nᵾmp, wote Jisas nga ik kupa nitim kᵾⱡ, nᵾmp mot ndur ei nga, ya ila mor. 10 Na Nuim ei nga mbi paka rormin ui ei kᵾn, na nga rukᵾr orunga, Muⱡnga Wingti ei ndi omba, na tᵾpa kanggᵾⱡnga kᵾn, na nga mbuldung orung pit ei, pikul ik nᵾtᵾm ni mel, wi mam ti urum ei ndi omba, nimba mel, “Uⱡ enim kan ei mel, buk ila rokᵾn mana ndukᵾn, Got nga rapa tenda wamp mormin kona 7 kᵾⱡ ila ngukᵾn mundi! Ei kona peng Episis, Smerna, Pergamam kᵾn, Taiyataira, Sartis, Pilatelpiya kᵾn Leyorasiya kᵾn,” nitim.

12 Ni kᵾn, ik ninim wamp ei, kᵾnimp nᵾmp tᵾp ropᵾl rop kᵾndᵾr mel, gol lam eng nui 7 kᵾⱡ, kiya nok molk pok etᵾng. Ei nga, ruk ting ila wamp mel ti, anggilpa murum. Ni ndi, wal pᵾki ruⱡ kat pᵾkrᵾm kᵾⱡ mba mel, kᵾmp puⱡ ila puⱡnga, pepil ombil ila kan ti rᵾrᵾm ei, gol ila mim etᵾng ei nga, eng nurum. 14 Wote, elim nga peng ndi kᵾⱡ, kona kopa kurmuⱡa etᵾm ei mel itim. Wote, elim nga mong waⱡ raⱡ, ndip anmbil mel kiya nurum. 15 Wote, elim nga kᵾmp raⱡ ain bras na, ndip ila kaⱡina, eng norum ni mel, eng nurum. Wote, elim nga ik ei, nu kuⱡᵾp ropa tᵾmᵾm tᵾpa petᵾm ni mel itim. 16 Wu ni mipil 7 kat, elim nga ki mbo orunga ambuⱡpa, wote koiya ti mbuldung oldung raⱡ nengina, mul ti keta ila ekit urum. Elim nga kuimp keta ei, ant ropa rᵾⱡang ronduⱡ purum ni mel purum.

17 Elim ni kandᵾp kᵾn, anggilip mur ni, mboi nᵾmp mana mbo wamp kuⱡi mel, wu ei nga kᵾmp puⱡ ila koⱡᵾp tit. Wote, elim nga ki mbo orunga ndi mana ndupa, na ambuⱡpa, nimba mel, “Mundmong iti nᵾti! Puⱡ mundi uⱡ mbᵾ kep, wote etpa pora ndui uⱡ mbᵾ kep, na mint mor. Akup na rᵾk rᵾk kont mor. Na kur ni, wote akup kᵾni, na rᵾk rᵾk kont muⱡimp ei nga mor. Wamp kormin uⱡ ei kᵾn, wote wamp kui nga mormin kona ei nga ronduⱡ ei, nanim tep mor.

19 Uⱡ ei nga, akup penim uⱡ mbᵾ kep, wote pemba uⱡ mbᵾ kᵾn pora, nim kan ei mel, mon rokᵾn mana ndui! 20 Na nga ki mbo ei ndi, mipil 7 ambᵾⱡᵾp mor kan kᵾⱡ kᵾn, wote gol ila mim etᵾng lam 7 kiya nomba morum kᵾⱡ nga puⱡ ei, ei mel. Mipil 7 ambᵾⱡᵾp mor kᵾⱡ, Got nga manga rapa 7 kᵾⱡ ila wamp mormin kᵾⱡ nga anggelo kᵾⱡ. Wote, gol ila mim etᵾng lam 7 kiya mel,” nitim.